Merkevarebygging og identitetsdesign har slått om seg som eit resultat av globalisering og auka konkurranse. I ei tid der avstandane vert stadig mindre og kommersialisering gjer at nasjonar framstår som meir og meir like, er tanken at lokale stader med særpreg og ein bevisst identitet vil ha eit fortrinn. Hull i England («top 10 city»), Øresund i Sverige («the human capital»), Ülemiste i Estland («home of innovation»), Hong Kong («Asia´s world city») og Sør-Afrika er berre nokre eksempel på ei rekkje plassar som inspirert av suksessen til kommersielle bedrifter har etablert visuelle identitetar.

Frå trivsel til kreativitet
I Noreg har me i løpet av få år sett korleis designbyrået Gate har etablert visuell identitet for Odda, Bleed har «branda» Gudbrandsdalen (erstatta av Creuna si identitetsbygging for regionen Lillehammer), Os inspirer og trøndelagsfylka går frå å marknadsføra trivsel til kreativitet i eit forsøk på å verta den mest spennande regionen i Europa. Når Trøndelag til og med utviklar sin eigen skrifttype for å skilja seg frå andre, er bakgrunnen auka konkurranse om kompetanse, spesielt med regionane Stavanger, Øresund (Sverige) og Tampare (Finland)¹. Andre målgrupper kan vera investorar, innbyggjarar og turistar (Gulmann, 2005, Olins, 2003).