Alle som leverer inn eit bidrag til KVAm-kolleksjonen, vert medeigarar, eller aksjonærar. Bidraga kan vera visuelle, skriftlege eller i form av lyd.
Samlinga med mønster, motiv, varemerke og fargepalettar er eigd i fellesskap av medlemmene. Alle med tilknyting til Kvam kan verta medeigarar gjennom å bidra med bilete og historiar eller forslag til mønster og varemerke. Det er meininga at samlinga skal forvaltas av eit styre på vegne av medlemmene, men at kommuneadministrasjonen skal ha sekretærfunksjonen. Styret vert valt av årsmøtet. Medlemskapen er uforpliktande. Som medeigar kan du vera med og påverka utviklinga av samlinga når ho skal oppdaterast med nye mønster og varemerke. Du kan også søkja om å få bruka motiv og mønster til profilering av lokale bedrifter og organisasjonar. Det bør med jamne mellomrom (helst årleg) engasjerast designar eller kunstnar til å utvikla nye mønster og merke. Arbeidet kan finansierast gjennom sal av produkt som tek utgangspunkt i samlinga (eksempelvis kalenderar, julekort, souvenirar etc.). Ein del av samlinga er tilgjengeleg på nett, der kvemmingane kan setja saman og produsera sine eigne produkt, i første omgang virtuelle, men det er mogeleg å utvida til å også gjelda fysiske produkt.
Dei visuelle bidraga
Biletet i bakgrunnen viser eksempel på visuelle bidrag, som er bearbeidd og sett saman til eit mønster. Kvam ligg i Hardanger, ein region som er kjend også utanfor Noreg takka vera den vakre fruktbløminga om våren. Mønsteret tek utgangspunkt i det naturbaserte temaet «bløming», og inneheld teikningar frå fleire elevar ved ulike skular i Kvam.
Elevbedrifter
Eit lite utval gåveprodukt og souvenirar vert produserte for hand gjennom elevbedrifter. I første omgang maskottar under namnet «Kvameratar», spelet «tre på rad« med spelebrikker frå lokal industri og natur, samt buttons. Målet er å skapa eigarskap og forankring, samt å synleggjera alternativ bruk av lokale ressursar, og bevisstgjera om stadlege kvalitetar. Det er positivt å tidleg synleggjera verdien av å bruka design i utvikling av produkt og emballasje. Det er eit mål å stimulera til gründarkultur. Samarbeidet med elevbedrifter gjer det også mogeleg å produsera og selja unika, og maskottane tek utgangspunkt i gjenbruk. Samarbeidet kan vidareførast til å gjelda bedrifter knytt til arbeidstrening for vaksne.